من اجمل الأقوال اللي بتحكي عن الروح القدس هيّي للقدّيس انطونيوس البدواني اللي قال: "النار عندها ٤ طباع: بتحرق، بتطهّر، بتدفّي و بتعطي ضَو. هيك الروح القدس بيحرق الخطايا، بيطهّر القلوب، بيعطي دفا و طاقة و بيضوّي عتمة الجهل!"
يا روح السلام، يا روح الحب، يا روح الرب! حلّ علينا و عا بيوتنا، بارك عيالنا و اللي منحبّن و رافقهن عا طول و عطينا نحنا و ياهن مواهبك المقدّسة!
عطينا الفهم تا نعرف نحلّل الإشيا صحّ، عطينا القوّة تا نتحمّل و نواجه الصعوبات، عطينا التقوى تا نعرف نصلّي، عطينا مخافة الله تا نعيش بخَوف الله مش الخَوف من الله و الفرق كبير، عطينا العلم تا نشغّل المنطق اللي عطانا ياه ربنا، عطينا المشورة تا نحطّ قناعاتنا عا جنب و نسلمك حياتنا و نقلّك لتكن مشيئتك و عطينا الحكمة تا نعرف نميّز بين الخير و الشر...ارسل روحك ايها المسيح فيتجدّد وجه الأرض!
#شربل سكران بألله
