لكل يوم زوّادة:
بيخبرو عن ملك شايف حالو كتير و كان في خبير بالمملكة كتير شاطر و الكل بيستشيرو. قرر الملك يسألو عن شغلة بس لما شاف شكلو غيّر رأيو و قال كيف معقول نصيحة منيحة تجي من حدا هلقد بشع! قام الخبير قلو: مولانا اذا بتسمحلي اسأل سؤال. قال الملك: اسأل. قلو الخبير: حضرتك بشو بتخزّن النبيذ؟ جاوب الملك: ببراميل خشب متل كل الناس. قلو الخبير: معقول ملك عظيم متلك يخزّن نبيدو متل كل الناس بخشب مش ببراميل ذهب! قال الملك: معك حق و امر ينقلو النبيذ عا براميل ذهب. بعد فترة انتزع النبيذ، عصّب الملك و بعت ورا الخبير و صار يصرّخ...قلّو الخبير: الشكل الخارجي ما بيعبّر عن المضمون شوف براميل الذهب كيف فيهن نبيذ منزوع و شوف نوعية النبيذ ببراميل الخشب العادي "البشع"...تعلّم الملك درسو منيح و عيّن الخبير مستشارو!
#شربل سكران بألله
