لكل يوم زوّادة:
يا رب، الوجع و المرض نعمة منّك منحملُن بفرح و رجا و حب و صبر و ابتسامة... بس يا رب ببلدنا الناس عم تموت كل يوم ببيوتها و عا بواب المستشفيات لأنو مش قادرين يأمنو المبالغ المطلوبة او لأنو الدوا مقطوع... السما مليانة اطباء انت اخترتن متل مار شربل، رفقا، الحرديني و غيرن، كلنا ايمان انو اذا صلّينا من كل قلبنا رح يتدخلوا بالوقت المناسب اذا كانِت مشيئتك. سامحنا يا رب الإنسان بطبعو بيخاف و الضغط اللي عم نعيشو كل يوم بأمننا الصحي، الغذائي و بأبسط حقوقنا عم يخنقنا! اليوم صلاتنا عا نية كل مريض و كل شخص واقفة المصاري بينو و بين صحتو و حياتو...منخصّ بالذكر مرضى السرطان و خاصّة الصبية جيسي حبشي اللي تعرّفنا عليها بصورة عبّرت فيها قديش بتحبّ الرياضة و الحياة و اليوم حالتها عم تتدهور و العلاج غالي كتير... يسوع يقدّملِك الصحة و يشفيكي و يخلّي ضحكتك و ايمانك اللي فاتو عا كل قلب!
#شربل سكران بألله
