لكل يوم زوّادة:
بيخبرو عن ست غنيّة عملت عمليّة و عازت دمّ ما كان حدا يتبرّع لأنّو الفئة نادرة. عرضو ولادها مبلغ من المصاري للّي بيتبرّع. سمع رجّال معروف انّو بخيل و اجا تبرّع بالدم. لمّا طلعت المرا من المستشفى و كانت حاسّة انها مدينة بحياتها لهالرجال اشترتلو ذهب هديّة بس لمّا تعرّفت عليه عرفتو بخيل و بيحبّ المصاري... بعد فترة رجعت اضطرّت هالستّ تفوت عالمستشفى، هالمرّة الزلمي ركض يتبرّع بدم طمع بالمقابل اللي رح يطلعلو. لمّا شفيت الستّ اخدتلو باقة زهور مع بطاقة شكر. قلها وين المصاري و الدهب؟!! جاوبتو: يمكن ما اشتريت هيك شي لأنّو عم يمشي بعروقي دم حدا بخيل و طمّيع! الزوّادة اليوم بتعلّمنا شغلتين: نساعد بس نكون قادرين بلا ما ننطر مقابل ابدا و انّو نتشارك الخيرات اللي عطانا ياها ربنا مع غيرنا و ما نكون بخلاء او طمّيعين ابدا! الله يرافقكن!
#شربل سكران بألله
